 |
 |
Sevgim.az |  |
 |
Fu (麩?) – Yaponiya mətbəxində buğda qlütenindən hazırlanan ənənəvi yemək. Süngərvari quruluşu və zülalla zəngin olması səbəbilə digər inqrediyentlərin dadını asanlıqla özünə çəkir. Şorbalara, qazan xörəklərinə və qızartmalara əlavə olunur. Bitki mənşəli olduğu üçün buddistlərin vegetarian mətbəxi olan şocin ryoriyə daxildir.[1]
Fu buğda ununun xəmirə çevrilməsi və qlütenin alınması ilə hazırlanır. Xəmir yoğrulur və su ilə yuyularaq nişastadan təmizlənir. Əldə olunan elastik kütlə müxtəlif inqrediyentlərlə qarışdırılır. Bişirmə, buğlama və qızartma texnikaları ilə müxtəlif növ fu hazırlanır.[1]
Funun ilkin variantı hesab olunan mençin Muromaçi dövründə Çində təhsil alan Zen rahibləri tərəfindən Yaponiyaya gətirilmişdir. Orta əsrlərdə buğda bol olmadığı üçün fu əsasən məbədlərdə və imperator sarayında xüsusi günlərdə yeyilirdi. Edo dövründə buğda əkinçiliyi və daşınması inkişaf etdiyi üçün buğda daha əlçatan məhsula çevrilmişdir. Nəticədə, fu siravi insanların gündəlik qidalanmasında daha çox yer almağa başlamışdır.[1]
Müasir dövrdə Yaponiyada fu aşağı kalorili, lakin yüksək zülal dəyərlərinə malik qida kimi istehlak olunmağa davam edir.[1]
Nama-fu küncüt, yomoqi, darı və ya düyü unu kimi əlavə inqrediyentlərdən hazırlanır. Nama-fu buğa verilir və qaynadılır. Müxtəlif formalarda (məsələn, düzbucaqlı denqaku) hazırlanır və şirin miso pastası ilə yeyilir. Nama-fu kayseki mətbəxi üçün sakura və payız yarpaqları kimi dekorativ formalarda da hazırlana bilər.[1]
Yaki-fu buğda ununun qlütenə əlavə olunması və sobada bişirilməsi ilə hazırlanır. Bu, onun xarab olmadan uzun müddət saxlanılmasına imkan verir. Marinadları və bulyonları asanlıqla özünə çəkdiyi üçün şorbalarda və qazan yeməklərində geniş istifadə olunur. Yaki-funun bir neçə növü var. Komaçi-fu miso şorbasına əlavə olunur. Dairəvi formada olan kuruma-fu funun bir çubuğun ətrafında qat-qat bükülüb bişirilməsi ilə hazırlanır. İta-fu yastı formada olub pörtləmələrdə və qızartma yeməklərində ət əvəzi istifadə olunur. Yaki-fuya əlavə olunan buğda ununun miqdarı onun sıxlığını müəyyən edir. Daha çox un ağır, daha az un yüngül yaki-fu hazırlamaq üçün tətbiq olunur. Yaki-funun digər növlərinə rəngli, gül formasında olan hana-fu, yuvarlaq formada olan uzumaki-fu, böyük ölçüdə olan mancu-fu daxildir. Regional variantları mövcuddur.[1]
Aqe-fu buğda ununun və qlütenin qarışdırılması ilə hazırlanır. Lakin qaynadılmaq əvəzinə qızardılır və uzunsov məhsul alınır. Aqe-fu əsasən Miyaqi prefekturasının şimalında və İvate prefekturasının cənubundan hazırlanır. Senday-fu adlı növü düyünün üzərisində yumurta ilə servis olunur.[1]
Vikianbarda Fu (yemək) ilə əlaqəli mediafayllar var. |
 |
SEVGIM.AZ |  |
 |
|