 |
 |
Sevgim.az |  |
 |
Oğlan və onun atomu (ing. A Boy and His Atom) – 2013-cü ildə IBM Research tərəfindən hazırlanmış və "YouTube"da buraxılmış qısametrajlı stop-mouşn filmi. Bir dəqiqə davam edən bu film köçürücü tunel mikroskopu ilə və karbon monoksid molekullarını hərəkət etdirməklə çəkilmişdir. Bu ikiatomlu molekulların hərəkət etdirilməsi ilə çəkilən şəkillər daha sonra filmin kadrlarının hazırlanmasında istifadə olunmuşdur.[2] Film 2013-cü ildə Ginnesin Rekordlar Kitabı tərəfindən dünyanın ən kiçik stop-mouşn filmi kimi tanınmışdır.[3]
| Oğlan və onun atomu | |
|---|---|
| ing. A Boy and His Atom | |
.jpg) Atom (solda) və oğlan. Film karbon monoksid molekullarının köçürücü tunel mikroskopu ilə şəklinin çəkilməsi ilə hazırlanmışdır. | |
| Rejissor | Niko Kasaveççiya |
| İstehsalçı | 1st Ave Machine |
| Distribütor | IBM Research |
| İlk baxış tarixi | 30 aprel 2013[1] |
| Müddət | 1 dəqiqə 33 saniyə |
| Ölkə | |
| Dil | ingiliscə |
| IMDb | ID2884148 |
"Oğlan və onun atomu" filmi IBM alimlərindən ibarət komanda tərəfindən şirkətin San-Xose şəhərində yerləşən Almaden Tədqiqat Mərkəzində yaradılmışdır.[4] Filmin yaradılmasında IBM şirkətinin reklam agentliyi "Ogilvy & Mather" iştirak etmişdir.[5] Alimlər köçürücü tunel mikroskopundan istifadə etmiş və karbon monoksid molekullarını mis substrat üzərisində mis iynə ilə 1 nanometr məsafədən hərəkət etdirmişdirlər. Temperatur çox aşağı olduğu üçün (−268.15 °C) molekullar substrat ilə əlaqə qurmuş və yerində qalmışdır.[6] Hər molekulun oksigen komponenti köçürücü tunel mikroskopu tərəfindən çəkilərkən nöqtə kimi göründüyü üçün bir çox nöqtələrdən ibarət olan şəkillər yaradıla bilmişdir.[5]
Komanda 65 karbon monoksid molekulu ilə 242 şəkil yaratmışdır. Şəkillər birləşdirilmiş və stop-mouşn film yaradılmışdır.[7] Hər bir kadrın ölçüsü 25x45 nanometrdir.[5] Dörd tədqiqatçı iki həftə ərzində ümumilikdə 18 saat işləyərək filmi ərsəyə gətirmişdir.[6]
Filmin qrafikləri və səs effektləri ilk videooyunların qrafiklərini və səs effektlərini xatırladır. Layihə lideri Andreas Heynrix filmi " atom miqyasında olan dünyanı paylaşmağın əyləncəli yolu" adlandırmışdır.[5] Bundan əlavə, tədqiqatçılar "Ulduz yolu qaranlığa doğru" filmini tanıtmaq üçün Federasiya loqosu, "Enterprise" gəmisi və Vulkan salamının təsvir olunduğu şəkillər də hazırlamışdırlar.[7][8]
Ginnesin Rekordlar Kitabı filmi dünyanın ən kiçik stop-mouşn filmi kimi tanımışdır.[5] Film Tribeka Onlayn Film Festivalına qəbul olunmuşdur. Film 24 saat ərzində 1 milyon baxışı, 48 saat ərzində 2 milyon baxışı keçmişdir.
Film tədqiqatçılar tərəfindən şagirdlərdə elmə maraq oyatmağın əyləncəli bir yolu kimi istifadə olunsa da, kompüterlərin saxlaya biləcəyi məlumat həcmini artıra biləcək iş kimi tanınmışdır. Onlar 2012-ci ildə bir bitlik kompüter yaddaşının milyonlarla deyil, cəmi 12 atomluq qrupda saxlana biləcəyini nümayiş etdirmişdirlər.[6]
 |
 |
SEVGIM.AZ |  |
 |
|
