Memmedov Rovsen Talib Oglu - Wikipedia - Sevgim.az

Rövşən Məmmədov 4 sentyabr 1965-ci ildə Tovuz rayonunda anadan olmuşdur. Əslən Tovuz rayonunun Qaraxanlı kəndindəndir. O, bu kəndin tanınmış və ziyalı “Zaloğlu” nəslinə mənsubdur. 1971–1982-ci illərdə Tovuz şəhərindəki A.S. Puşkin adına orta məktəbdə təhsil almışdır. 1982-ci ildə Lvov Ali Hərbi Siyasi Məktəbinə qəbul olunmuş və 1986-cı ildə oranı müvəffəqiyyətlə bitirmişdir.

Təhsilini başa vurduqdan sonra Naxçıvan MSSR-in İliç (indiki Şərur) rayonunun Qıvraq kəndində yerləşən hərbi hissədə zabit kimi xidmətə başlamışdır. 1990–1992-ci illərdə Naxçıvan şəhərində xidmətini davam etdirmişdir. 1992-ci ilin oktyabrında Qərb zonasında tabur komandirinin müavini kimi döyüş əməliyyatlarında iştirak etmişdir. Daha sonra Azərbaycan Respublikası Prezident yanında Xüsusi İdarədə əməliyyat müvəkkili kimi fəaliyyətə başlamışdır. 1994-cü ildə Gədəbəy bölgəsində, 1999-cu ildə isə Qazax rayonunda xüsusi xidmət orqanlarında rəhbər vəzifələrdə çalışmışdır. Sonrakı illərdə Dövlət Təhlükəsizliyi Xidmətinin (DTX) sərhəd və cəbhə bölgələrində, o cümlədən Şəmkir korpusunda Hərbi Əks-Kəşfiyyat şöbəsinin rəisi olmuşdur. 2005-ci ildə Ermənistan xüsusi xidmət orqanlarının agentura şəbəkəsinin ifşasında iştirak etmiş və bu xidmətlərinə görə “Polkovnik” hərbi rütbəsinə layiq görülmüşdür. 2007-ci ildə DTX-nin Qusar rayon şöbəsinin rəis müavini, 2009–2015-ci illərdə isə Ağstafa rayon şöbəsinin rəisi olmuşdur. 2017-ci ildə Rabitə və Yüksək Texnologiyalar Nazirliyinin nəzdindəki “Hərbiləşdirilmiş Mühafizə İdarəsi”nin “Radio-televiziya Yayımı və Peyk Rabitəsi” İB-də Alternativ Teleradio Yayım Stansiyası kompleksi üzrə şöbə rəisi vəzifəsində çalışmışdır.

Rövşən Məmmədov uzun illər ərzində Silahlı Qüvvələr və xüsusi xidmət orqanlarında xidmət etmişdir. O, 35 ilə yaxın müddətdə Silahlı Qüvvələrdə, bunun 24 ildən çoxunu xüsusi xidmət orqanlarında keçirmişdir. Aşağıdakı dövlət mükafatlarına layiq görülmüşdür: - “Qüsursuz xidmətə görə” I dərəcəli medal - “Qüsursuz xidmətə görə” II dərəcəli medal - “Qüsursuz xidmətə görə” III dərəcəli medal Həmçinin Azərbaycan Silahlı Qüvvələri və Qarabağ müharibəsi veteranı olmuşdur.

Rövşən Məmmədov ailəli idi, dörd övlad atası olmuşdur. 2 yanvar 2022-ci ildə qəfil ürək tutması nəticəsində vəfat etmişdir. Rövşən Məmmədov peşə fəaliyyətində dürüstlüyü, prinsipiallığı və məsuliyyəti ilə seçilmişdir. Onun əziz xatirəsi onu tanıyanların qəlbində daim yaşayır, Vətənə sədaqətli xidmət nümunəsi kimi gələcək nəsillərə örnək göstərilir.