 |
 |
Sevgim.az |  |
 |
Hi Score Girl, Yaponiyada tanınan adı ilə High Score Girl[a] – Rensuke Oşikiri tərəfindən yazılan və çəkilən manqa seriyası. 2010-cu ilin oktyabrından 2018-ci ilin sentyabrına qədər "Square Enix" nəşriyyatının "Monthly Big Gangan" jurnalında serializasiya olunmuşdur. Manqa seriyasında hadisələr 1990-cı illərdə – arkade döyüş oyunlarının populyar olduğu dövrdə baş verir. Hekayə vaxtının çoxunu oyun salonlarında keçirən altıncı sinif şagirdi olan Haruo Yaquçi və döyüş oyunlarında çox güclü olan varlı sinif yoldaşı Akira Ono arasında yaranan romantik münasibətlərdən bəhs edir.
| Hi Score Girl | |||||||||||||||||||
 Birinci tankobon cildinin üzlüyü. Personajlar: Haruo Yaquçi (solda) və Akira Ono (sağda). | |||||||||||||||||||
| ハイスコアガール (Hay Sukoa Qaru) | |||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
| Janr | romantik komediya | ||||||||||||||||||
| Manqa | |||||||||||||||||||
| Manqaka | Rensuke Oşikiri | ||||||||||||||||||
| Nəşriyyat | Square Enix | ||||||||||||||||||
| Jurnal | Monthly Big Gangan | ||||||||||||||||||
| Demoqrafiya | seynen | ||||||||||||||||||
| Nəşr tarixi | 25 oktyabr 2010 – 25 sentyabr 2018 | ||||||||||||||||||
| Cildlər | 10 (cild siyahısı) | ||||||||||||||||||
| Anime serialı | |||||||||||||||||||
| Rejissor | Yoşiki Yamakava | ||||||||||||||||||
| Ssenarist | Tatsuhiko Urahata | ||||||||||||||||||
| Bəstəkar | Yoko Şimomura | ||||||||||||||||||
| Studiya | J.C.Staff | ||||||||||||||||||
| Lisenziya | Netflix | ||||||||||||||||||
| Kanal | Tokyo MX, MBS, BS11 | ||||||||||||||||||
| Yayım tarixi | 13 iyul 2018 – 20 dekabr 2019 | ||||||||||||||||||
| Seriyalar | 21 + 3 OVA (seriya siyahısı) | ||||||||||||||||||
| |||||||||||||||||||
"J.C.Staff" studiyası tərəfindən çəkilən anime serialı adaptasiyasının birinci mövsümü 2018-ci ildə, ikinci mövsümü 2019-cu ildə yayımlanmışdır. 2019-cu "Hi Score Girl DASH" adlı spin-off manqası serializasiya olunmağa başlamışdır.
1991-ci ildir. Arkade oyun salonları və 2D döyüş oyunları Yaponiyada çox populyardır. Haruo Yaquçi dərslərinə fikir verməyən, bütün gününü oyun salonlarında keçirən və döyüş oyunlarında peşəkarlaşmağı qarşısına məqsəd kimi qoyan altıncı sinif şagirdidir. Oyunlardan başqa heç bir şey fikirləşməyən Haruo öz bacarıqları ilə yerli oyun salonlarında müəyyən qədər nüfuza malikdir və oyunlardakı bacarıqları ilə öyünməyi sevir. Lakin bir gün oyunla eyni sinifdə oxuyan, məktəbdə qiymətləri əla olan, varlı bir ailədən gələn Akira Ono onu asanlıqla "Street Fighter II" oyununda məğlub edir. Haruo bu gözlənilməz məğlubiyyətdən sonra Akira Ononu əsas rəqibi kimi görməyə başlayır və onu oyunlarda üstələmək istəyir. Onlar öz aralarında rəqabət edərkən eyni zamanda aralarında romantik münasibətlər də inkişaf etməyə başlayır.
Rensuke Oşikirinin sözlərinə görə uşaqlıqda "Street Fighter II" oynamaq üçün oyun salonlarına gedirdi. Bu səbəbdən bu oyun manqanın hekayəsində vacib yer tutur.[1]
Anime serialı adaptasiyası 2013-cü ilin dekabrında anons edilsə də,[2] 2014-cü ildə müəlliflik hüquqları ilə bağlı yaşanan mübahisə səbəbilə anime ləğv olunmuşdur.[3] Mübahisə həll olunduqdan sonra anime serialı üzərində iş yenidən başlamışdır. Əvvəlcə animenin 2D formatında hazırlanması planlaşdırılmışdı, çünki 2013-cü ildə 3D üçün texniki imkanlar zəif idi.[4] Studiya qarşı qarşıya oturan oyunçuların pis görsənməməsi,[5] oyun salonlarının və oyun görüntülərinin həqiqi görünməsi üçün əvvəlcə oyun salonlarının, daha sonra personajların 3D-CGI ilə çəkilməsinə qərar vermişdir.[6] Manqa müəllifi Oşikiri animenin 3D-CGI ilə çəkiləcəyini eşidəndə təəccüblənmiş, animenin "necə görünəcəyini ağlında canlandıra bilməmiş" və adaptasiyasının pis olacağından narahat olmuşdur.[5] Animedəki CGI səhnələrini çəkmək üçün "SMDE" studiyasına müraciət etmişdirlər, çünki onların "Danchi Tomoo" animesindəki işini bəyənmişdirlər. Onlar əvvəlcə nümunə kimi tanıdıcı video hazırlamış, işləri bəyənildikdən sonra bu iş onlara tapşırılmışdır. İstehsal prosesi 2017-ci ilin payızında başlamışdır. Komanda 1990-cı illərin atmosferini və personajların emosiyalarını əks etdirməyə çalışmış, Fukuvaray üz ifadə sistemindən istifadə etmişdir. Matsukura animedəki hər oyun salonunu fərdi xarakteristika ilə təsvir etməyə çalışmışdır.[7]
.jpg)
Prodüser Şinya Tsuruoka bir müsahibəsində qeyd etmişdir ki, "oyunlardan real görüntülər olmadan animeni çəkmək mənasız idi". O, istehsal prosesindən öncə hər bir oyun şirkətindən icazə almaq üçün müqavilələr imzalamışdır. İstehsalçı heyət oyun salonlarının ölçüləri haqqında dəqiq məlumatlar əldə etmək üçün ölkə daxilində araşdırma aparmışdır, çünki bu haqda sənədləşdirilmiş məlumatlar tapa bilməmişdirlər.[3] Proses zamanı oyun araşdırmaçısı Keniçi İşiquronun köməyindən yararlanmışdırlar.[6] Animasiya prodüseri Yuci Matsukuranın sözlərinə görə anime üçün oyunların ekran görüntülərini almaq üçün müxtəlif üsulları dəfələrlə yoxlamışdırlar. Bu səbəbdən animenin formatını dəyişməli olublar. Çünki videoların həcmi standart həcmdən 2 dəfə çox idi.[3] Animelər 24fps ilə çəkilsə də, oyun görüntülərinin yaxşı görsənməsi üçün əvvəlcə 30fps formatı yoxlanmış, sonda isə animenin 60fps ilə çəkilməsinə qərar vermişdirlər.[6] Animedəki oyun səhnələrini çəkmək üçün "Mikado" oyun mərkəzindən olan peşəkar oyunçuların köməyindən yararlanmışdırlar. Matsukuraya görə birinci seriyada "Final Fight" oyunundakı mükəmməl xallıq oyun görüntüsünü əldə etmək ən çətin iş idi.[3] Tsuruokanın sözlərinə görə isə "Tokimeki Memorial" oyunundakı bombaları oyuna əlavə etmək üçün çətinlik çəkmişdirlər.[8] Manqa müəllifi Oşikiri də bu prosesdə iştirak etmişdir: o, "Vampire Hunter" oyununun görüntüsünü çəkmək üçün Fobos adlı personajı oynamışdır.[9]
Oşikiri bir müsahibəsində qeyd etmişdir ki, anime adaptasiyasının birinci mövsümünü o qədər bəyənmişdir ki, animeni "40 dəfə izləmişdir".[3] Anime adaptasiyasının istehsalı başlayanda manqa seriyasının təkcə 6 cildi çıxdığı üçün əvvəlcə bir mövsümdən ibarət olması və təkcə ilk 4 cildi adaptasiya etməsi planlaşdırılmışdı. Lakin Tsuruoka Koharunun hekayəsini yarımçıq qoymaq istəmədiyi üçün 5-ci və 6-cı cildləri də adaptasiya etmək qərarına gəlmişdir. Belə olan halda hekayə 12 seriyaya sıxışmayacağı üçün 13–15-ci seriyalar OVA kimi hazırlanmışdır.[5] Tsuruoka manqa seriyasının 10-cu cilddən sonra bitəcəyini öyrənəndə və finalın konsepsiyasından xəbərdar olduqdan sonra ikinci mövsümü çəkmək istəmiş və bunu Matsukuraya bildirmişdir.[9] İkinci mövsümün ssenarisi və hekayə lövhəsi birinci seriyadan başlayaraq yox, sonuncu seriyadan başlayaraq birinci seriyaya doğru ardıcıllıqla hazırlanmışdır.[1]
Akira Ono seriya boyunca danışmayan bir personaj olduğu üçün istehsalçı heyət yeni və saf bir səsə malik Sayumi Suzuşironu seçməyə qərar vermişdir. Suzuşiro qeyd etmişdir ki, personajının heç bir replikası olmadığı üçün narahat idi və personajı sadəcə nəfəs səsləri ilə necə ifadə edə biləcəyini düşünürdü.[10] Haruonun dialoqları çox olduğu üçün ağır dialoqların öhdəsindən gələ biləcək aktyor axtarırdılar. Əvvəlcə Haruonu səsləndirməsi üçün qadın seyyu fikirləşsələr də, oğlanların həmin yaşdakı sadəlövhlüyünü əks etdirmək üçün kişi seyyu axtarmağa qərar vermişdirlər. Dinləmələr zamanı Oşikiri aktyorların səsinə görə Haruonun üzünü çəkməyə və Haruo üçün ən uyğun səsi tapmağa çalışırdı. O, Kohey Amasakinin səsini eşidəndə onun Haruo üçün ən uyğun səs aktyoru olduğunu düşünmüşdür. Koharu üçün isə təbii səsə malik bir aktrisa axtardıqları üçün Yuuki Hiroseni seçmişdirlər.[9]
Manqa seriyası Rensuke Oşikiri tərəfindən yazılmış və illüstrasiya olunmuşdur. 25 oktyabr 2010-cu ildən 25 sentyabr 2018-ci ilə qədər "Square Enix" nəşriyyatının "Monthly Big Gangan" jurnalında serializasiya olunmuşdur.[11] Manqa seriyasının 10 tankobon cildi buraxılmışdır. Birinci cild 25 fevral 2012-ci ildə,[12] sonuncu cildi 25 mart 2019-cu ildə buraxılmışdır.[13] 6 iyun 2013-cü ildə manqanın 4-cü cildi ilə birlikdə rəsmi fanat kitabı nəşr olunmuşdur.[14] 25 aprel 2019-cu ildə rəsmi fanat kitabı "Kajimest Continue" buraxılmış və fanat kitabına 24 səhifəlik bonus manqa daxil edilmişdir.[13] 24 oktyabr 2020-ci ildə "Monthly Big Gangan" jurnalında manqa üçün xüsusi van-şot fəsil nəşr olunmuşdur.[15]
Müəllif hüquqları ilə bağlı məsələyə görə 2014-cü ilin avqustundan 2016-cı ilin iyuluna qədər manqa seriyasının serializasiyasında fasilə yaranmışdır. Məsələnin həllindən sonra 25 iyul 2016-cı ildə manqanın serializasiyası davam etmişdir.[16] 2014-cü ildə manqanın ilk beş cildi satışdan yığışdırılsa da, 2016-cı ildə "Hi Score Girl Continue" adı altında yeni üzlüklərlə yenidən buraxılmışdır.[11] Bu buraxılışa 16 səhifəlik van-şot manqa da daxildir.[17]
Rensuke Oşikiri tərəfindən yazılan və illüstrasiya olunan "Hi Score Girl DASH" adlı spin-off manqası 25 dekabr 2019-cu ildə "Monthly Big Gangan" jurnalında serializasiya olunmağa başlamışdır. Manqa seriyasında hadisələr 2007-ci ildə baş verir və əsas personajı məktəbdə müəllim kimi işləyən Koharu Hidakadır.[18] Manqanın birinci tankobon cildi 25 mart 2021-ci ildə buraxılmışdır.[19]
25 dekabr 2023-cw ildə "Monthly Big Gangan" jurnalının 1-ci buraxılışında manqa seriyasının anime serialı adaptasiyası anons edilmişdir.[2] "J.C.Staff" və "SMDE" studiyaları tərəfindən çəkilən anime serialının rejissoru Yoşiki Yamakava, ssenaristi Tatsuhiko Uehara, personaj dizayneri Mitsuru Kuvabata, bəstəkarı Yoko Şimomuradır. Birinci mövsüm 13 iyuldan 28 sentyabr 2018-ci ilə qədər Tokyo MX və digər kanallar vasitəsilə yayımlanmışdır.[20] Açılış mahnısı "sora tob sakana" qrupu tərəfindən ifa olunan "New Stranger"[b] mahnısı, bağlanış mahnısı Etsuko Yakuşimaru tərəfindən ifa olunan "Hōkago Distraction"[c] mahnısıdır.[21] Anime 24 dekabr 2018-ci ildə "Netflix" tərəfindən yayımlanmışdır.[22]
28 sentyabr 2018-ci ildə animenin birinci mövsümünün davam seriyaları kimi nəzərdə tutulmuş 3 OVA seriyasının buraxılacağı açıqlanmışdır.[23] OVA seriyaları "Hi Score Girl: Extra Stage" adı ilə 20 mart 2019-cu ildə buraxılmışdır. OVA buraxılışına Oşikiri tərəfindən hazırlanmış 8 səhifəlik xüsusi manqa fəsili daxil edilmişdir.[24] OVA seriyaları 4 oktyabrdan 18 oktyabr 2019-cu ilə qədər televiziya vasitəsilə yayımlanmışdır.[25]
Doqquz seriyadan ibarət olan ikinci mövsüm 21 mart 2019-cu ildə anons edilmişdir.[26] İkinci mövsüm 25 oktyabrdan 20 dekabr 2019-cu ilə qədər yayımlanmışdır.[25] İkinci mövsümün açılış mahnısı "sora tob sakana" qrupu tərəfindən ifa olunan "Flash" mahnısı, bağlanış mahnısı Etsuko Yakuşimaru tərəfindən ifa olunan "Unknown World Map"[d] mahnısıdır.[27] İkinci mövsüm 9 aprel 2020-ci ildə "Netflix" tərəfindən yayımlanmışdır.[28]
"Hi Score Girl Doujo"[e] adlı radio verilişi 18 dekabr 2018-ci ildə yayımlanmağa başlamışdır. Sonuncu – 8-ci seriya[f] 4 oktyabr 2019-cu ildə buraxılmışdır.[29] Verilişin aparıcısı anime serialında Haruonu səsləndirən Kohey Amasakidir.[23]
Manqa seriyası 2012-ci ildə "TV Bros." jurnalı tərəfindən təqdim olunan Bros. Komiks Mükafatının qalibi olmuşdur.[30]
 |
 |
SEVGIM.AZ |  |
 |
|
