Apocalypse Hotel - Wikipedia - Sevgim.az

2057-ci ildə "infortunim çirklənməsi" adlandırılan hadisə Yer kürəsində yayılmağa başlayır və insanlar artıq Yerin atmosferində nəfəs ala bilmirlər. Çirklənməyə qarşı müalicə və ya əks-tədbir tapa bilməyən bəşəriyyət kosmik gəmilərə minib Yer kürəsini tərk etməyə məcbur olur və Yer tərk edilmiş planetə çevrilir. Bir əsr sonra sivilizasiyadan geriyə qalan tək şey Yaponiyanın Qinza bölgəsində yerləşən "Gingarou" hoteli olur. Bu hotel Yaçiyo adlı qinoidin rəhbərliyi altında işləyən robot heyəti tərəfindən idarə olunur. Robot heyəti bəşəriyyətin qayıdışına qədər hotelin fasiləsiz işləməsinə nəzarət edərkən yadplanetli bir ziyarətçi onların son əsrdəki ilk qonağına çevrilir.

Daha sonra müharibə səbəbi ilə planetlərini tərk etməyə məcbur qalmış tanuki gəlmələr (tanukiyalılar) hoteli ziyarət edirlər. Ailə kosmik gəmilərini evə çevirib Yerdə yaşamağa başlayır. Tanukiyalılardan biri olan Ponko hotelin işçisinə çevrilir. Tanukiyalıların uzun ömrü olduğu üçün növbəti bir neçə əsr boyunca Yaçiyo ilə yaşayaraq hoteli inkişaf etdirməyə və yadplanetli qonaqlar cəlb etməyə kömək edir. Lakin hələ də insanların qayıdışını gözləyirlər. Hoteldə edilən dəyişikliklərlə hoteldə spa açılır, viski hazırlamaq üçün zavod qurulur və kosmik reklamlar yerləşdirilir.

Nəhayət Tomari İori adlı bir insan öz kosmik gəmisi ilə Yerə gəlir. O və hotel heyəti ilk yadplanetli qonaq tərəfindən verilmiş xüsusi bir bitki sayəsində Yerdəki çirklənmənin yoxa çıxdığını kəşf edirlər. Lakin insanlar kosmosda çox uzun müddət yaşadıqları üçün Yerin atmosferi onlar üçün alergenə çevrilir. Ona görə də Yerə ancaq qısa müddətə gələ bilərlər. Tomari Yeri tərk edərkən Yaçiyoya daha çox insanın hotelə gələcəyinə dair söz verir. Yaçiyo və onun komandası hoteli idarə etməyə davam edir.

"Cygames Pictures" studiyasınin prezidenti Nabuhiro Takenaka 2020-ci ildə ssenarist Şiqeru Murakoşiyə yaxınlaşaraq "bəşəriyyətin məhv olmasından sonra robotların idarə etdiyi hotelə baş çəkən yadplanetlilər" haqqında anime çəkmək istədiyini bildirmişdir. Murakoşi bu konsepsiya əsasında ilkin ssenari yazmış və maraqlı olacaq hadisələr fikirləşmişdir. O, epizod ssenaristi Sotaro Vada və rejissor Kana Şundonun ideyalarını və rəylərini öyrənmişdir.^[1] Murakoşi hotel personajlarının inkişafı ilə yanaşı hotelin özünün də inkişafını əks etdirən hekayə yazmaq istəmişdir.^[2] Şundo layihəyə konsepsiyaya və İzumi Takemotonun orijinal personaj dizaynlarına görə qoşulmuşdur. O, 12 seriyanın xülasəsini oxuduqdan sonra hekayənin yaxşı yazıldığını və əyləncəli olduğunu düşünmüşdür. Şundo personaj dizaynlarını "nostaljik, amma tarixi keçməmiş" hesab etmişdir.^[1]

Takenaka ilkin mərhələdən etibarən animenin hazırlanma prosesində iştirak etmiş və animenin istehsal meneceri olmuşdur. O, hekayənin əvvəli və sonu haqqında təkliflər vermiş, ssenari iclaslarında təsadüfi təkliflərlə çıxış etmişdir. Takenaka öz rolunu "yumorist" adlandırmışdır. Hadisələr postapokaliptik dünyada baş versə də, Takenaka əyləncəli anime yaratmağı hədəfləmiş və animenin izləyicidən asılı olaraq həm kədərli, həm də gülməli şərh olunmasını istəmişdir. İstehsal prosesinin əvvəlində Yaçiyo əvvəlcə "emosiyasız" və "sakit qərarlar verən" robot personaj kimi dizayn olunmuşdu. Lakin istehsalçı heyət süni intellekt və robototexnika sahəsindəki irəliləyişləri araşdırdıqdan sonra onun düşüncə tərzini insana daha yaxın etməyə qərar vermişdir. Takenaka personajı daha cəlbedici etmək üçün ona "naməlum genişləndirilmiş funksiyalar" əlavə etməyi təklif etmişdir. Şundo Yaçiyonu "moe personaj" kimi yox, "işçi qadın" kimi təsəvvür etməyə çalışmışdır.^[1]

Anime serialındakı bəzi səhnələr və personajlar üçün digər populyar filmlərindən ilhamlanılmışdır. Animenin 7-ci seriyasındakı kosmos səhnəsi üçün "Qravitasiya" filmindən, Ponkonun 8-ci seriyadakı zirehli geyimi üçün "Yadgəlmə 2" filmindən, 10-cu seriyadakı balta ilə qapını açmaq səhnəsi üçün "Parıltı" filmindən və həmin seriyadakı cəsəd gizlətmə hekayəsi üçün "Harri ilə bağlı narahatlıq" filmindən təsirlənmişdirlər. Ətraf mühiti yoxlama robotu personajı "Ulduzlararası" filmindəki TARS robotundan ilhamlanaraq yaradılmışdır.^[2] Hotelin yerləşdiyi yer kimi Qinza rayonunun seçilməsinin səbəbi bölgənin Edo dövrünə qədər uzanan ənənələrə malik olmaqla bərabər Qərb mədəniyyətinin təsirini əks etdirməsi, eləcə də, Tokio körfəzinə yaxın yerləşməsidir. Belə ki, istehsalçı heyət qiyamətdən sonra dəniz səviyyəsinin yüksəldiyini də əks etdirmək istəmişdir. Animenin ssenarisi ilk dəfə yazılanda hotelin yerləşdiyi yer kimi saat qülləsi düşünülmüşdür. Animenin "qinzalılığı"nı əks etdirmək üçün Qinzaya aid simvolik tikili hotelin binası, Kabukiza teatrının önü isə hotelin onseni kimi seçilmişdir. "Ginza Wako" alış-veriş mərkəzi hotel üçün model kimi istifadə olunmuşdur.^[1]

Animenin açılış mahnısı kimi Aiko tərəfindən ifa olunan "Skirt" mahnısı seçilmişdir. Rejissor Şundo mahnıya qulaq asdıqdan sonra adətən iki nəfər tərəfindən ifa olunan, lakin bir nəfər tərəfindən ifa olunan rəqs performansından ibarət açılış hazırlamaq istəmişdir. O, rəqs hərəkətlərini çəkərək xoreoqrafiyanı hazırlamış və bunun əsasında açılışın videosu hazırlanmışdır. Aiko anime üçün ayrıca bağlanış mahnısı olan "Capsule" mahnısını ifa etmiş, mahnıda Yaçiyonun tənhalığını hiss etdirmək istəmişdir. 6-cı seriyada ifa olunan "Apocalypse" səhnə daxili mahnısının Romi Park tərəfindən ifa olunmasını animenin səs istehsalı meneceri Takuro Okada təklif etmişdir.^[2]

Anime serialı 28 avqust 2024-cü ildə anons edilmişdir.^[3] "CyberAgent" və "CygamesPictures" studiyası tərəfindən^[4] çəkilən anime serialının rejissoru Kana Şundo, ssenaristi Şiqeru Murakoşi, personaj dizayneri İzumi Takemoto, animasiya üçün personaj dizayneri Natsuki Yokoyama və bəstəkarı Yoşiaki Fucisavadır.^[5] Anime serialı 8 apreldən 24 iyun 2025-ci ilə qədər "Abema", "Lemino", "Animate Times" servisləri və Nippon TV kanalı vasitəsilə yayımlanmışdır (AT-X kanalında 11 apreldə yayımlanmağa başlamışdır).^[6][7][8][9] Açılış mahnısı Aiko tərəfindən ifa olunan "Skirt"^[b] mahnısı, bağlanış mahnısı eyni ifaçı tərəfindən ifa olunan "Capsule"^[c] mahnısıdır.^[5] 6-cı seriyada Romi Park tərəfindən ifa olunan "Apocalypse"^[d] səhnə daxili mahnısı səsləndirilmişdir.^[2] Anime "Crunchyroll" tərəfindən lisenziyalaşdırılmışdır.^[7]

İzumi Takemoto tərəfindən yazılan və illüstrasiya olunan "Apocalypse Hotel Pusupusu"^[e] spin-off manqası 11 apreldən 27 iyun 2025-ci ilə qədər "Takeshobo" nəşriyyatının "Storia Dash" manqa saytında serializasiya olunmuşdur.^[10] Manqanın ilk və tək tankobon cildi 7 iyul 2025-ci ildə buraxılmışdır.^[11]

"Apocalypse Hotel" "Anime News Network" tərəfindən 2025-ci il yaz mövsümünün ən yaxşı animelərindən biri seçilmişdir.^[12]

• apocalypse-hotel.jp — rəsmi saytı