Yunanıstan paytaxtı Afinada minlərlə insan küçələrə çıxaraq hökumətin əmək qanunvericiliyinə təklif etdiyi dəyişikliklərə etiraz edib.

“sevgim.az” xarici KİV-ə istinadən xəbər verir ki, etirazçılar arasında dövlət qulluqçuları, həmkarlar ittifaqları və özəl sektor işçiləri də var.

Onlar 24 saatlıq ümummilli tətil elan ediblər.

Qeyd olunur ki, hökumətin təklif etdiyi qanun layihəsi iş şəraitinə daha çox “elastiklik” gətirməyi nəzərdə tutur. Sənədə görə, bəzi növbələr 13 saata qədər uzadıla bilər, həftəlik iş vaxtı 48 saat müəyyən edilir və illik maksimum 150 saatlıq əlavə iş icazəsi verilir.

Lakin Yunanıstanın Ümumi Həmkarlar Konfederasiyası bunun əksinə olaraq iş həftəsinin 37,5 saat müəyyən edilməsini tələb edir. İttifaq nümayəndələri bildiriblər ki, uzunmüddətli iş rejimi işçiləri tükəndirir.

Tətil çərçivəsində Afinada ictimai nəqliyyat, taksilər və dövlət idarələri ya fəaliyyətini dayandırıb, ya da qısa iş qrafiki ilə işləyib. Etiraz aksiyaları şəhərin əsas küçələrində davam edir və hökumətlə danışıqların yaxın günlərdə davam edəcəyi gözlənilir.