“Soyuq əllər, isti ürək” xeyriyyə yarmarkasında baş vermiş yanğınla bağlı “Nərgiz” Fondu açıqlama yayıb.

“sevgim.az” xəbər verir ki, məlumatda deyilir:

“Yanğın hadisəsi ilkin araşdırmaların nəticələrinə əsasən qurumuş yağ qalıqlarının qısaqapanma yaratması ilə başlayıb. Hadisə yerində olan işçi vəziyyəti aradan qaldırmaq məqsədilə həmin sahəyə su tökdükdə suyun isti yağla reaksiyası nəticəsində alovlanma güclənərək açıq yanğına səbəb olub.

Təhlükəsizlik və texniki nəzarət qruplarının operativ müdaxiləsi nəticəsində yanğın 15 dəqiqə ərzində tam söndürülüb. Yanğın digər pavilyonlara keçməyib, yarmarkanın digər hissələri üçün təhlükə yaranmayıb. Xəsarət alan yoxdur.

Hadisə zamanı yarmarkada 24/7 fəaliyyət göstərən təhlükəsizlik heyəti tərəfindən yanğınsöndürmə balonlarından istifadə olunub, paralel şəkildə Dövlət Yanğın Mühafizəsi Xidmətinin əməkdaşları hadisə yerinə cəlb edilib. Ziyarətçilərin ərazidən təxliyəsi 5 dəqiqə ərzində təhlükəsiz və nəzarətli şəkildə həyata keçirilib.

Hazırda hadisənin səbəbləri ilə bağlı araşdırma davam edir. Araşdırma tamamlandıqdan sonra ictimaiyyətə əlavə məlumat, o cümlədən varmarkanın iş saatları barədə ətraflı açıqlama veriləcəkdir.

Qeyd edirik ki, yarmarka ərazisində bütün obyektlər mövcud texniki normalara uyğun şəkildə quraşdırılmışdır və təhlükəsizlik üzrə texniki komanda fasiləsiz (24/7) rejimdə fəaliyyət göstərir”.