İyulun 30-da Milli Məclisin sədri Sahibə Qafarova Parlament Sədrlərinin VI Dünya Konfransı çərçivəsində - “2030-cu ilədək Dayanıqlı İnkişaf Məqsədlərinə (DİM) nail olmaq: Beynəlxalq əməkdaşlıq üçün hansı yeni imkanlar mövcuddur?” mövzusunda keçirilən panel müzakirəsində çıxış edib.

“sevgim.az” xəbər verir ki, parlamentin spikeri çıxışında deyib ki, Dayanıqlı İnkişaf Məqsədlərinin uğurla həyata keçirilməsi ilə bağlı ciddi narahatlıqlar hələ də qalmaqdadır.

Qeyd olunub ki, ölkəmizin azad edilmiş Qarabağ və Şərqi Zəngəzur bölgələrinin dirçəldilməsi, eləcə də keçmiş məcburi köçkünlərin doğma yurdlarına qayıdışını nəzərdə tutan “Böyük Qayıdış” proqramının həyata keçirilməsi DİM-lərin uğurla reallaşdırılmasına mühüm töhfə verir. Aparılan yenidənqurma işləri ilə yanaşı, bu ərazilərdə bu gün artıq əlli mindən çox insan yaşayır, işləyir və təhsil alır.

Spiker Sahibə Qafarova bildirib ki, azad edilmiş ərazilərin minalarla çirklənməsi bu ərazilərin inkişafı üçün əsas maneə olaraq qalır. Məhz buna görə də Azərbaycan “Təhlükəsiz qayıdış, məskunlaşma, bərpa, rifah və sülh üçün mina təhlükəsi ilə mübarizəyə dair fəaliyyətlər”i özünün 18-ci milli DİM-i kimi qəbul edib. Həmçinin, bu məqsədin BMT-nin 18-ci Dayanıqlı İnkişaf Məqsədi kimi təsis olunması da təklif edilib.