Oktyabrın 11-də Pakistanla Əfqanıstan arasında yerləşən sərhəd bölgəsində baş vermiş silahlı qarşıdurma nəticəsində ciddi itkilər qeydə alınıb.

“sevgim.az” “Tolo News” agentliyinə istinadən xəbər verir ki, Əfqanıstanın rəsmi nümayəndəsi Zəbiullah Mücahid qarşıdurma zamanı ölkənin silahlı qüvvələrindən doqquz hərbçinin həlak olduğunu, daha 16 nəfərin isə yaralandığını bildirib.

Əfqanıstan tərəfi, həmçinin, Pakistanın da ağır itkilər verdiyini iddia edir. Kabil rəsmilərinin açıqlamasına görə, Pakistan ordusunun 58 hərbçisi həlak olub, 30 nəfər isə yaralanıb. Bununla belə, İslamabad bu məlumatları rəsmi şəkildə təsdiqləməyib.

Digər tərəfdən, Pakistanın “Dunya News” media qurumu isə qarşı tərəfin – Əfqanıstan ordusunun onlarla hərbçisini itirdiyini yazıb. Bu məlumatlar da rəsmi mənbələr tərəfindən dəqiqləşdirilməyib.

Qeyd edək ki, iki qonşu ölkə arasında münasibətlər zaman-zaman gərginləşir və sərhəd bölgəsində silahlı toqquşmalar baş verir.