Azərbaycan üzərindən dəmir yolu ilə Ermənistana göndərilən Qazaxıstan taxılının ilk partiyası həmin ölkəyə çatıb. 

“sevgim.az” “Sputnik Ermənistan”a istinadən xəbər verir ki, bu barədə məlumatı Ermənistanın ərazilərin idarə olunması və infrastruktur naziri David Xudatyan açıqlayıb.

Onun sözlərinə görə, 1000 ton həcmində olan məhsul Ermənistanın “Ayrum” stansiyasındadır.

Xudatyan qeyd edib ki, taxılın daşınması üçün Qazaxıstan – Rusiya – Azərbaycan – Gürcüstan – Ermənistan marşrutundan istifadə edilib. 

Erməni nazir xatırladıb ki, bir neçə gün əvvəl Ermənistana dəmir yolu vasitəsilə Azərbaycan üzərindən Rusiya taxılı gətirilib: “Bu nəinki siyasi, həm də iqtisadi cəhətdən əhəmiyyət daşıyır. Belə ki, bununla Ermənistana yüklərin daşınması xərcləri azalır”.

Xatırladaq ki, noyabrın 6-da Azərbaycan ərazisindən keçməklə Ermənistana Qazaxıstan taxılı daşıyan 15 vaqondan ibarət yük qatarı Biləcəri Dəmiryol Stansiyasından yola düşüb.