Gəncədə beşmərtəbəli yaşayış binasında yanğın başlayıb.

“sevgim.az"in məlumatına görə, hadisə binanın beşinci mərtəbəsində qeydə alınıb.

Hadisədən sonra partlayış baş verib. Nəticədə bir nəfər xəsarət alıb.

Yanğın Zarina Nağıyevaya məxsus 5 otaqlı (63 kvm) evdə baş verib.

Hadisə zamanı Elnur Qurbanov müxtəlif yanıq xəsarətləri ilə Gəncə şəhərindəki tibb müəssisələrindən birinə, oradan isə Bakı şəhərinə aparılıb.

Yanğın yerinə Fövqaladə Hallar Nazirliyinin (FHN) Gəncə Yanğından Mühafizə İdarəsinin yanğınsöndürən avtomobilləri və canlı qüvvəsi cəlb olunub.

***

FHN Mətbuat xidmətindən bildirilib ki, nazirliyin “112” qaynar telefon xəttinə Gəncə şəhəri, İ.Cəfərov küçəsində yaşayış binasında yanğın baş verməsi barədə ilkin məlumat daxil olub. 

Məlumatla əlaqədar dərhal əraziyə FHN-in Dövlət Yanğından Mühafizə Xidmətinin və Gəncə Regional Mərkəzinin qüvvələri cəlb edilib. 

Əlavə məlumat veriləcək.

***

FHN-in Mətbuat xidmətindən bildirilib ki, hadisə yerində əməliyyat şəraitinin qiymətləndirilməsi zamanı beşmərtəbəli yaşayış binasının beşinci mərtəbəsində yerləşən mənzildə yanğınla müşayiət olunan partlayışın baş verdiyi müəyyən olunub.

FHN qüvvələri tərəfindən həyata keçirilmiş zəruri və təxirəsalınmaz tədbirlər sayəsində baş vermiş yanğın genişlənməsinə, o cümlədən digər mənzillərə keçməsinə imkan verilmədən qısa müddətdə söndürülüb.

Təhlükəsizlik tədbirləri çərçivəsində bina sakinləri təxliyə olunub. 

Partlayış dalğasının təsirindən 1989-cu il təvəllüdlü Qurbanov Elnur Nazim oğlu və 1963-cü il təvəllüdlü Nağıyeva Zərinə Abuzər qızı müxtəlif dərəcəli bədən xəsarətləri alıb.      

Hadisə ilə əlaqədar aidiyyəti qurumlar tərəfindən araşdırma aparılır.

***

TƏBİB hadisə ilə bağlı məlumat yayıb.

Bildirilib ki, bu gün saat 16:30 radələrində 1989-cu il təvəllüdlü şəxs (kişi cinsli) Gəncə Şəhər Birləşmiş Xəstəxanasının nəzdində olan Abbas Səhhət adına xəstəxanaya hospitalizasiya olunub. Bədənin 2-3 dərəcəli 75% yanığı diaqnozu təyin edilən şəxsə ilkin tibbi xidmət göstərilib. Vəziyyəti orta ağır qiymətləndirilən şəxsin müalicəsi müvafiq şöbədə davam etdirilir.

Yunis Quliyev