ABŞ Senatında Respublikaçılar Partiyasının federal hökumətin maliyyələşməsini davam etdirməklə bağlı irəli sürdüyü layihə lazım olan 60 səsi toplaya bilməyib.

“sevgim.az” xəbər verir ki, bu, yerli vaxtla gecə yarısından etibarən (Bakı vaxtilə saat 08:00) şatdaunu qaçılmaz edir.

Maliyyələşməni noyabrın 21-dək uzatmağı nəzərdə tutan plan 45 səsə qarşı 55 səs toplayıb. Artıq oktyabrın 1-dən işçilər məzuniyyətə göndəriləcək və federal xidmətlər dayanacaq.

Respublikaçılar Partiyasının təmsilçiləri də həmçinin Demokratlar Partiyasının maliyyələşdirməni oktyabrın sonuna qədər uzadan və səhiyyə xərclərini 1 trilyon dollardan çox artıran layihəsinin 47 əleyhinə, 53 lehinə səslə Senatdan keçməsinin qarşısını alıblar.

***

Ağ Ev rəsmi şəkildə ABŞ federal hökumətinin yaxın saatlarda fəaliyyətini dayandıracağını elan edib.

Senat federal agentliklərin maliyyələşdirilməsini nəzərdə tutan xərcləmə qanununu qəbul edə bilmədikdən sonra Ağ Evin İdarəetmə və Büdcə İdarəsi rəsmi bəyanat yayıb. Bəyanatda Demokratlar Partiyası yaranmış vəziyyətə görə ittiham olunub və təsirə məruz qalacaq dövlət qurumlarına planlı bağlanma prosedurlarını dərhal həyata keçirmək tövsiyə olunub.

“Demokratlar Partiyasının bu vəziyyəti nə qədər davam etdirəcəyi məlum deyil. Bu da bağlanmanın nə qədər çəkəcəyini proqnozlaşdırmağı çətinləşdirir”, – deyə bəyanatda bildirilir.

***

ABŞ federal hökuməti Bakı vaxtı ilə 08:00-da fəaliyyətini qismən dayandırıb.  

Qeyd edək ki, bu dövr ərzində dövlət müəssisələrinə vəsait xərcləmək qadağan edilir, əməkdaşların əksəriyyəti isə öz hesabına məzuniyyətə göndərilir. 

ABŞ qanunvericiliyinə əsasən, milli təhlükəsizliyin təmin edilməsi və xarici siyasət məsələlərinə cavabdeh olan nazirlik və qurumlar federal hökumətin maliyyələşdirilməsinin dayandırılması halında belə işləməyə davam edirlər. 

Bu şərtlərdə işinə davam etməyə məcbur olan dövlət qulluqçuları əməkhaqqı almır, lakin adətən onların maaşı maliyyələşmə məsələsi həll edildikdən sonra ödənilir.