“sevgim.az” xəbər verir ki, bu barədə şair, tərcüməçi Qismət Rüstəmov sosial şəbəkə hesabında paylaşım edib.

“Qanun” Nəşrlər Evi milli irsimizə yiyə durmaq, folklorumuzun əbədiyaşar mifoloji məntiqini iş həyatına tətbiq etmək üçün yeni qonorar sistemi yaradıb. Kim hər həftə Şahbaz bəyin paylaşdığı yemək videolarına baxıb bu yanıltmacı deyə bilmirsə, qonorarını ödəmirlər: “Aşpaz Şahbaz aş asmış, asmışsa da, saz azmış”, - “Qanun” Nəşrlər Evində etdiyi tərcümələrin qonorarını ala bilmədiyindən şikayətlənən şair qeyd edib.

Məsələ ilə bağlı “Qanun” Nəşrlər Evinin rəhbəri Şahbaz Xuduoğlu ilə əlaqə saxladıq. O bildirdi ki, nəşriyyat bu vaxta qədər Qismət Rüstəmovun kitablarını öz hesabına nəşr edib: “Yəni “Qanun” nəşriyyatının Qismətə borcu yoxdur, Qismətin nəşriyyata borcu ola bilər. Çünki ilk dəfə ən yeni ədəbiyyat seriyasında Qismətin şeir kitablarını “Qanun” nəşriyyatı nəşr edib, həm də şeir satılmayan bir vaxtda. “Qanun” nəşriyyatı onun xanımı İlahə Əkbərlə əməkdaşlıq edir”.

Ş.Xuduoğlu əlavə olaraq bildirib ki, İlahə Əkbərin bu vaxta qədər aldığı qonorarın həcmi və qalan borc barədə də mühasibatlıq araşdırdıqdan sonra məlumat veriləcək.

Bundan başqa o qeyd edib ki, ümumiyyətlə qonorarların ödənilməməsinə səbəb isə nəşriyyatın yay aylarında yaşadığı böhrandır: “Yay aylarında həqiqətən də bizim qonorar büdcəmiz sıfıra enir. Biz tərcüməçilərin qonorarını gecikdiririk. Bizim ödəməmək kimi bir niyyətimiz yoxdur. Bəzi tərcüməçilərə çox, bəzilərinə az verilir. Lakin daim şikayətçi olan şəxslər də var, qonorar verilsə də, verilməsə də… Bəzən olur ki, kitab tərcümədən gələndə onun qonorarı çox olur və birdəfəlik ödəmək mümkün olmur. O, hissələrə bölünür və aylar üzrə ödənilir. Bizə də çox böyük borcu olan kitab mağazaları var. Onlar da yay aylarında böhran yaşayırlar. Hər il parklarda sərgilərimiz olurdu, bu il onu edə bilməmişik. İndi səbrsizlik göstərmək və “Qanun” qonorar ödəmir” deyib iddia etmək düzgün deyil. O zaman bunu demək olar ki, nəşriyyat ümumiyyətlə ödəməkdən imtina etsin. Amma bu belə deyil. Biz həmişə xəbərdarlıq edirik ki, yay aylarında ödəniş etmək mümkün olmayacaq. İndi ümid edirik ki, sərgi olacaq və bundan sonra hər birinin qonorarı ödəniləcək”.

Lamiyə Məmmədova